1.1 - ఇషే త్వోర్జే త్వా - కృష్ణ యజుర్వేద తైత్తిరీయ సంహితా పాఠః || కృష్ణ యజుర్వేద తైత్తిరీయ సంహితా పాఠః }|| ప్రథమ కాండం

 

1.1 - ఇషే త్వోర్జే త్వా - కృష్ణ యజుర్వేద తైత్తిరీయ సంహితా పాఠః

కృష్ణ యజుర్వేదీయ తైత్తిరీయ సంహితాయా-మ్ప్రథమకాణ్డే ప్రథమః ప్రశ్నః - దర్​శపూర్ణమాసౌ

ఓ-న్నమః పరమాత్మనే, శ్రీ మహాగణపతయే నమః,

శ్రీ గురుభ్యో నమః । హ॒రిః॒ ఓమ్ ॥

ఇ॒షే త్వో॒ర్జే త్వా॑ వా॒యవ॑-స్స్థోపా॒యవ॑-స్స్థ దే॒వో వ॑-స్సవి॒తా ప్రార్ప॑యతు॒ శ్రేష్ఠ॑తమాయ॒ కర్మ॑ణ॒ ఆ ప్యా॑యద్ధ్వమఘ్నియా దేవభా॒గ-మూర్జ॑స్వతీః॒ పయ॑స్వతీః ప్ర॒జావ॑తీ-రనమీ॒వా అ॑య॒ఖ్ష్మా మా వ॑-స్స్తే॒న ఈ॑శత॒ మా-ఽఘశగ్ం॑సో రు॒ద్రస్య॑ హే॒తిః పరి॑ వో వృణక్తు ధ్రు॒వా అ॒స్మి-న్గోప॑తౌ స్యాత బ॒హ్వీ-ర్యజ॑మానస్య ప॒శూ-న్పా॑హి ॥ 1 ॥

(ఇ॒షే - త్రిచ॑త్వారిగ్ంశత్ ) (అ. 1)

య॒జ్ఞస్య॑ ఘో॒షద॑సి॒ ప్రత్యు॑ష్ట॒గ్ం॒ రఖ్షః॒ ప్రత్యు॑ష్టా॒ అరా॑తయః॒ ప్రేయ-మ॑గాద్ధి॒షణా॑ బ॒ర్॒హిరచ్ఛ॒ మను॑నా కృ॒తా స్వ॒ధయా॒ విత॑ష్టా॒ త ఆ వ॑హన్తి క॒వయః॑ పు॒రస్తా᳚-ద్దే॒వేభ్యో॒ జుష్ట॑మి॒హ బ॒ర్॒హి-రా॒సదే॑ దే॒వానా᳚-మ్పరిషూ॒తమ॑సి వ॒ర్॒షవృ॑ద్ధమసి॒ దేవ॑బర్​హి॒ర్మా త్వా-ఽ॒న్వ-మ్మా తి॒ర్య-క్పర్వ॑ తే రాద్ధ్యాసమాచ్ఛే॒త్తా తే॒ మా రి॑ష॒-న్దేవ॑బర్​హి-శ్శ॒తవ॑ల్​శం॒-విఀ రో॑హ స॒హస్ర॑వల్​శా॒ [స॒హస్ర॑వల్​శాః, వి వ॒యగ్ం రు॑హేమ] 2

వి వ॒యగ్ం రు॑హేమ పృథి॒వ్యా-స్స॒మ్పృచః॑ పాహి సుస॒మ్భృతా᳚ త్వా॒ సమ్భ॑రా॒మ్యది॑త్యై॒ రాస్నా॑-ఽసీన్ద్రా॒ణ్యై స॒న్నహ॑న-మ్పూ॒షా తే᳚ గ్ర॒న్థి-ఙ్గ్ర॑థ్నాతు॒ స తే॒ మా-ఽఽ స్థా॒దిన్ద్ర॑స్య త్వా బా॒హుభ్యా॒ముద్య॑చ్ఛే॒ బృహ॒స్పతే᳚-ర్మూ॒ర్ధ్నా హ॑రామ్యు॒ర్వ॑న్తరి॑ఖ్ష॒మన్వి॑హి దేవఙ్గ॒మమ॑సి ॥ 3 ॥

(స॒హస్ర॑వల్​శా - అ॒ష్టాత్రిగ్ం॑శచ్చ) (అ. 2)

శున్ధ॑ద్ధ్వ॒-న్దైవ్యా॑య॒ కర్మ॑ణే దేవయ॒జ్యాయై॑ మాత॒రిశ్వ॑నో ఘ॒ర్మో॑-ఽసి॒ ద్యౌర॑సి పృథి॒వ్య॑సి వి॒శ్వధా॑యా అసి పర॒మేణ॒ ధామ్నా॒ దృగ్ంహ॑స్వ॒ మా హ్వా॒-ర్వసూ॑నా-మ్ప॒విత్ర॑మసి శ॒తధా॑రం॒-వఀసూ॑నా-మ్ప॒విత్ర॑మసి స॒హస్ర॑ధారగ్ం హు॒త-స్స్తో॒కోహు॒తో ద్ర॒ఫ్సో᳚ ఽగ్నయే॑ బృహ॒తే నాకా॑య॒ స్వాహా॒ ద్యావా॑పృథి॒వీభ్యా॒గ్ం॒ సా వి॒శ్వాయు॒-స్సా వి॒శ్వవ్య॑చా॒-స్సా వి॒శ్వక॑ర్మా॒ స-మ్పృ॑చ్యద్ధ్వ-మృతావరీ-రూ॒ర్మిణీ॒ర్మధు॑మత్తమా మ॒న్ద్రా ధన॑స్య సా॒తయే॒ సోమే॑న॒ త్వా-ఽఽత॑న॒చ్మీన్ద్రా॑య॒ దధి॒ విష్ణో॑ హ॒వ్యగ్ం ర॑ఖ్షస్వ ॥ 4 ॥

(సోమే॑ - నా॒ష్టౌ చ॑) (అ. 3)

కర్మ॑ణే వా-న్దే॒వేభ్య॑-శ్శకేయం॒-వేఀషా॑య త్వా॒ ప్రత్యు॑ష్ట॒గ్ం॒ రఖ్షః॒ ప్రత్యు॑ష్టా॒ అరా॑తయో॒ ధూర॑సి॒ ధూర్వ॒ ధూర్వ॑న్త॒-న్ధూర్వ॒ తం-యోఀ᳚-ఽస్మా-న్ధూర్వ॑తి॒ త-న్ధూ᳚ర్వ॒యం-వఀ॒య-న్ధూర్వా॑మ॒స్త్వ-న్దే॒వానా॑మసి॒ సస్ని॑తమ॒-మ్పప్రి॑తమ॒-ఞ్జుష్ట॑తమం॒-వఀహ్ని॑తమ-న్దేవ॒హూత॑మ॒-మహ్రు॑తమసి హవి॒ర్ధాన॒-న్దృగ్ంహ॑స్వ॒ మా హ్వా᳚-ర్మి॒త్రస్య॑ త్వా॒ చఖ్షు॑షా॒ ప్రేఖ్షే॒ మా భేర్మా సం-విఀ ॑క్థా॒ మా త్వా॑ - [మా త్వా᳚, హి॒గ్ం॒సి॒ష॒ము॒రు] 5

హిగ్ంసిషము॒రు వాతా॑య దే॒వస్య॑ త్వా సవి॒తుః ప్ర॑స॒వే᳚-ఽశ్వినో᳚-ర్బా॒హుభ్యా᳚-మ్పూ॒ష్ణో హస్తా᳚భ్యా-మ॒గ్నయే॒ జుష్ట॒-న్నిర్వ॑పామ్య॒గ్నీషోమా᳚భ్యా-మి॒ద-న్దే॒వానా॑మి॒దము॑ న-స్స॒హ స్ఫా॒త్యై త్వా॒ నారా᳚త్యై॒ సువ॑ర॒భి వి ఖ్యే॑షం-వైఀశ్వాన॒ర-ఞ్జ్యోతి॒-ర్దృగ్ంహ॑న్తా॒-న్దుర్యా॒ ద్యావా॑పృథి॒వ్యో- రు॒ర్వ॑న్తరి॑ఖ్ష॒ మన్వి॒-హ్యది॑త్యా స్త్వో॒పస్థే॑ సాదయా॒మ్యగ్నే॑ హ॒వ్యగ్ం ర॑ఖ్షస్వ ॥ 6 ॥

( మా త్వా॒ - షట్చ॑త్వారిగ్ంశచ్చ ) (అ. 4)

దే॒వో వ॑-స్సవి॒తో-త్పు॑నా॒త్వచ్ఛి॑ద్రేణ ప॒విత్రే॑ణ॒ వసో॒-స్సూర్య॑స్య ర॒శ్మిభి॒రాపో॑ దేవీరగ్రేపువో అగ్రేగు॒వో-ఽగ్ర॑ ఇ॒మం-యఀ॒జ్ఞ-న్న॑య॒తాగ్రే॑ య॒జ్ఞప॑తి-న్ధత్త యు॒ష్మానిన్ద్రో॑ ఽవృణీత వృత్ర॒తూర్యే॑ యూ॒యమిన్ద్ర॑-మవృణీద్ధ్వం-వృఀత్ర॒తూర్యే॒ ప్రోఖ్షి॑తా-స్స్థా॒గ్నయే॑ వో॒ జుష్ట॒-మ్ప్రోఖ్షా᳚మ్య॒గ్నీషోమా᳚భ్యా॒గ్ం॒ శున్ధ॑ద్ధ్వ॒-న్దైవ్యా॑య॒ కర్మ॑ణే దేవయ॒జ్యాయా॒ అవ॑ధూత॒గ్ం॒ రఖ్షో-ఽవ॑ధూతా॒

అరా॑త॒యో-ఽది॑త్యా॒స్త్వగ॑సి॒ ప్రతి॑ త్వా - [ప్రతి॑ త్వా, పృ॒థి॒వీ వే᳚త్త్వధి॒షవ॑ణమసి] 7

పృథి॒వీ వే᳚త్త్వధి॒షవ॑ణమసి వానస్ప॒త్య-మ్ప్రతి॒ త్వా-ఽది॑త్యా॒స్త్వగ్వే᳚త్త్వ॒గ్నేస్త॒నూర॑సి వా॒చో వి॒సర్జ॑న-న్దే॒వవీ॑తయే త్వా గృహ్ణా॒మ్యద్రి॑రసి వానస్ప॒త్య-స్స ఇ॒ద-న్దే॒వేభ్యో॑ హ॒వ్యగ్ం సు॒శమి॑ శమి॒ష్వేష॒మా వ॒దోర్జ॒మా వ॑ద ద్యు॒మద్వ॑దత వ॒యగ్ం స॑ఙ్ఘా॒త-ఞ్జే᳚ష్మ వ॒ర్॒షవృ॑ద్ధమసి॒ ప్రతి॑ త్వా వ॒ర్॒షవృ॑ద్ధం-వేఀత్తు॒ పరా॑పూత॒గ్ం॒ రఖ్షః॒ పరా॑పూతా॒ అరా॑తయో॒ రఖ్ష॑సా-మ్భా॒గో॑ ఽసి వా॒యుర్వో॒ వి వి॑నక్తు దే॒వో వ॑-స్సవి॒తా హిర॑ణ్యపాణిః॒ ప్రతి॑ గృహ్ణాతు ॥ 8 ॥

( త్వా॒ - భా॒గ - ఏకా॑దశ చ ) (అ. 5)

అవ॑ధూత॒గ్ం॒ రఖ్షో-ఽవ॑ధూతా॒ అరా॑త॒యో-ఽది॑త్యా॒స్త్వగ॑సి॒ ప్రతి॑ త్వా పృథి॒వీవే᳚త్తు ది॒వ-స్స్క॑మ్భ॒నిర॑సి॒ ప్రతి॒ త్వా-ఽది॑త్యా॒స్త్వగ్వే᳚త్తు ధి॒షణా॑-ఽసి పర్వ॒త్యా ప్రతి॑ త్వా ది॒వ-స్స్క॑మ్భ॒నిర్వే᳚త్తు ధి॒షణా॑-ఽసి పార్వతే॒యీ ప్రతి॑ త్వా పర్వ॒తిర్వే᳚త్తు దే॒వస్య॑ త్వా సవి॒తుః ప్ర॑స॒వే᳚-ఽశ్వినో᳚-ర్బా॒హుభ్యా᳚-మ్పూ॒ష్ణోహస్తా᳚భ్యా॒మధి॑ వపామిధా॒న్య॑మసి ధిను॒హి దే॒వా-న్ప్రా॒ణాయ॑ త్వా ఽపా॒నాయ॑ త్వా వ్యా॒నాయ॑ త్వా దీ॒ర్ఘామను॒ ప్రసి॑తి॒మాయు॑షేధా-న్దే॒వో వ॑-స్సవి॒తా హిర॑ణ్యపాణిః॒ ప్రతి॑ గృహ్ణాతు ॥ 9 ॥

(ప్రా॒ణాయ॑ త్వా॒ - పఞ్చ॑దశ చ) (అ. 6)

ధృష్టి॑రసి॒ బ్రహ్మ॑ య॒చ్ఛాపా᳚గ్నే॒ ఽగ్నిమా॒మాద॑-ఞ్జహి॒ నిష్క్ర॒వ్యాదగ్ం॑ సే॒ధా-ఽఽదే॑వ॒యజం॑-వఀహ॒ నిర్ద॑గ్ధ॒గ్ం॒ రఖ్షో॒ నిర్ద॑గ్ధా॒ అరా॑తయో ధ్రు॒వమ॑సి పృథి॒వీ-న్దృ॒గ్ం॒హా-ఽఽయు॑-ర్దృగ్ంహ ప్ర॒జా-న్దృగ్ం॑హ సజా॒తాన॒స్మై యజ॑మానాయ॒ పర్యూ॑హ ధ॒ర్త్రమ॑స్య॒న్తరి॑ఖ్ష-న్దృగ్ంహ ప్రా॒ణ-న్దృగ్ం॑హాపా॒న-న్దృగ్ం॑హ సజా॒తాన॒స్మై యజ॑మానాయ॒ పర్యూ॑హ ధ॒రుణ॑మసి॒ దివ॑-న్దృగ్ంహ॒ చఖ్షు॑- [చఖ్షుః॑, దృ॒గ్ం॒హ॒ శ్రోత్ర॑-న్దృగ్ంహ] 10

ర్దృగ్ంహ॒ శ్రోత్ర॑-న్దృగ్ంహ సజా॒తాన॒స్మై యజ॑మానాయ॒ పర్యూ॑హ॒ ధర్మా॑సి॒ దిశో॑ దృగ్ంహ॒ యోని॑-న్దృగ్ంహ ప్ర॒జా-న్దృగ్ం॑హ సజా॒తాన॒స్మై యజ॑మానాయ॒ పర్యూ॑హ॒ చిత॑-స్స్థ ప్ర॒జామ॒స్మై ర॒యిమ॒స్మై స॑జా॒తాన॒స్మై యజ॑మానాయ॒ పర్యూ॑హ॒ భృగూ॑ణా॒మఙ్గి॑రసా॒-న్తప॑సా తప్యద్ధ్వం॒-యాఀని॑ ఘ॒ర్మే క॒పాలా᳚న్యుపచి॒న్వన్తి॑ వే॒ధసః॑ ।

పూ॒ష్ణస్తాన్యపి॑ వ్ర॒త ఇ॑న్ద్రవా॒యూ వి ము॑ఞ్చతామ్ ॥ 11 ॥

(చఖ్షు॑ - ర॒ష్టాచ॑త్వారిగ్ంశచ్చ) (అ. 7)

సం-వఀ ॑పామి॒ సమాపో॑ అ॒ద్భిర॑గ్మత॒ సమోష॑ధయో॒ రసే॑న॒ సగ్ం రే॒వతీ॒-ర్జగ॑తీభి॒-ర్మధు॑మతీ॒-ర్మధు॑మతీభి-స్సృజ్యద్ధ్వమ॒ద్భ్యః పరి॒ ప్రజా॑తా-స్స్థ॒ సమ॒ద్భిః పృ॑చ్యద్ధ్వ॒-ఞ్జన॑యత్యై త్వా॒ సం-యౌఀ᳚మ్య॒గ్నయే᳚ త్వా॒-ఽగ్నీషోమా᳚భ్యా-మ్మ॒ఖస్య॒ శిరో॑-ఽసి ఘ॒ర్మో॑-ఽసి వి॒శ్వాయు॑రు॒రు ప్ర॑థస్వో॒రు తే॑ య॒జ్ఞప॑తిః ప్రథతా॒-న్త్వచ॑-ఙ్గృహ్ణీష్వా॒న్తరి॑త॒గ్ం॒ రఖ్షో॒-ఽన్తరి॑తా॒ అరా॑తయోదే॒వస్త్వా॑ సవి॒తా శ్ర॑పయతు॒ వర్​షి॑ష్ఠే॒ అధి॒ నాకే॒-ఽగ్నిస్తే॑ త॒నువ॒-మ్మా-ఽతి॑ ధా॒గగ్నే॑ హ॒వ్యగ్ం ర॑ఖ్షస్వ॒ స-మ్బ్రహ్మ॑ణా పృచ్యస్వైక॒తాయ॒ స్వాహా᳚ ద్వి॒తాయ॒ స్వాహా᳚ త్రి॒తాయ॒ స్వాహా᳚ ॥ 12 ॥

(స॒వి॒తా - ద్వావిగ్ం॑శతిశ్చ) (అ. 8)

ఆ ద॑ద॒ ఇన్ద్ర॑స్య బా॒హుర॑సి॒ దఖ్షి॑ణ-స్స॒హస్ర॑భృష్టి-శ్శ॒తతే॑జా వా॒యుర॑సి తి॒గ్మతే॑జాః॒ పృథి॑వి దేవయజ॒ - న్యోష॑ద్ధ్యాస్తే॒ మూల॒-మ్మా హిగ్ం॑సిష॒-మప॑హతో॒-ఽరరుః॑ పృథి॒వ్యై వ్ర॒జ-ఙ్గ॑చ్ఛ గో॒స్థానం॒-వఀర్​ష॑తు తే॒ ద్యౌర్బ॑ధా॒న దే॑వ సవితః పర॒మస్యా᳚-మ్పరా॒వతి॑ శ॒తేన॒ పాశై॒ర్యో᳚-ఽస్మా-న్ద్వేష్టి॒ య-ఞ్చ॑ వ॒య-న్ద్వి॒ష్మస్తమతో॒ మా మౌ॒గప॑హతో॒-ఽరరుః॑ పృథి॒వ్యై దే॑వ॒యజ॑న్యై వ్ర॒జం- [వ్ర॒జమ్, గ॒చ్ఛ॒ గో॒స్థానం॒-వఀర్​ష॑తు] 13

గ॑చ్ఛ గో॒స్థానం॒-వఀర్​ష॑తు తే॒ ద్యౌర్బ॑ధా॒న దే॑వ సవితః పర॒మస్యా᳚-మ్పరా॒వతి॑ శ॒తేన॒ పాశై॒ర్యో᳚-ఽస్మా-న్ద్వేష్టి॒ య-ఞ్చ॑ వ॒య-న్ద్వి॒ష్మస్తమతో॒ మా మౌ॒గప॑హతో॒-ఽరరుః॑ పృథి॒వ్యా అదే॑వయజనో వ్ర॒జ-ఙ్గ॑చ్ఛ గో॒స్థానం॒-వఀర్​ష॑తు తే॒ ద్యౌర్బ॑ధా॒న దే॑వ సవితః పర॒మస్యా᳚-మ్పరా॒వతి॑ శ॒తేన॒ పాశై॒ర్యో᳚-ఽస్మా-న్ద్వేష్టి॒ య-ఞ్చ॑ వ॒య-న్ద్వి॒ష్మస్తమతో॒ మా- [మా, మౌ॒గ॒రరు॑స్తే॒ దివ॒-మ్మా] 14

మౌ॑గ॒రరు॑స్తే॒ దివ॒-మ్మా స్కా॒న్॒. వస॑వస్త్వా॒ పరి॑ గృహ్ణన్తు గాయ॒త్రేణ॒ ఛన్ద॑సారు॒ద్రాస్త్వా॒ పరి॑ గృహ్ణన్తు॒ త్రైష్టు॑భేన॒ ఛన్ద॑సా-ఽఽది॒త్యాస్త్వా॒ పరి॑ గృహ్ణన్తు॒ జాగ॑తేన॒ ఛన్ద॑సా దే॒వస్య॑ సవి॒తు-స్స॒వే కర్మ॑ కృణ్వన్తి వే॒ధస॑ ఋ॒తమ॑స్యృత॒సద॑న-మస్యృత॒శ్రీర॑సి॒ ధా అ॑సి స్వ॒ధా అ॑స్యు॒ర్వీ చాసి॒ వస్వీ॑ చాసి పు॒రా క్రూ॒రస్య॑ వి॒సృపో॑ విరఫ్శి-న్నుదా॒దాయ॑ పృథి॒వీ-ఞ్జీ॒రదా॑ను॒ర్యామైర॑యన్ చ॒న్ద్రమ॑సి స్వ॒ధాభి॒స్తా-న్ధీరా॑సో అను॒దృశ్య॑ యజన్తే ॥ 15 ॥

(దే॒వ॒యజ॑న్యై వ్ర॒జం - తమతో॒ మా - వి॑రఫ్శి॒న్ - నేకా॑దశ చ) (అ. 9)

ప్రత్యు॑ష్ట॒గ్ం॒ రఖ్షః॒ ప్రత్యు॑ష్టా॒ అరా॑తయో॒ ఽగ్నేర్వ॒స్తేజి॑ష్ఠేన॒ తేజ॑సా॒ నిష్ట॑పామి గో॒ష్ఠ-మ్మా నిర్మృ॑ఖ్షం-వాఀ॒జిన॑-న్త్వా సపత్నసా॒హగ్ం స-మ్మా᳚ర్జ్మి॒ వాచ॑-మ్ప్రా॒ణ-ఞ్చఖ్షు॒-శ్శ్రోత్ర॑-మ్ప్ర॒జాం-యోఀని॒-మ్మా నిర్మృ॑ఖ్షం-వాఀ॒జినీ᳚-న్త్వా సపత్నసా॒హీగ్ం స-మ్మా᳚ర్జ్మ్యా॒శాసా॑నా సౌమన॒స-మ్ప్ర॒జాగ్ం సౌభా᳚గ్య-న్త॒నూమ్ । అ॒గ్నేరను॑వ్రతా భూ॒త్వా స-న్న॑హ్యే సుకృ॒తాయ॒ కమ్ ॥సు॒ప్ర॒జస॑స్త్వా వ॒యగ్ం సు॒పత్నీ॒రుప॑- [సు॒పథ్నీ॒రుప॑, సే॒ది॒మి॒ ।] 16

సేదిమ । అగ్నే॑ సపత్న॒దమ్భ॑న॒మద॑బ్ధాసో॒ అదా᳚భ్యమ్ ॥ ఇ॒మం-విఀష్యా॑మి॒ వరు॑ణస్య॒ పాశం॒ ​యఀమబ॑ద్ధ్నీత సవి॒తా సు॒కేతః॑ । ధా॒తుశ్చ॒ యోనౌ॑ సుకృ॒తస్య॑ లో॒కే స్యో॒న-మ్మే॑ స॒హ పత్యా॑ కరోమి ॥ సమాయు॑షా॒ సమ్ప్ర॒జయా॒ సమ॑గ్నే॒ వర్చ॑సా॒ పునః॑ । స-మ్పత్నీ॒ పత్యా॒-ఽహ-ఙ్గ॑చ్ఛే॒ సమా॒త్మా త॒నువా॒ మమ॑ ॥ మ॒హీ॒నా-మ్పయో॒-ఽస్యోష॑ధీనా॒గ్ం॒ రస॒స్తస్య॒ తే-ఽఖ్షీ॑యమాణస్య॒ ని- [నిః, వ॒పా॒మి॒ మ॒హీ॒నాం] 17

ర్వ॑పామి మహీ॒నా-మ్పయో॒-ఽస్యోష॑ధీనా॒గ్ం॒ రసో-ఽద॑బ్ధేన త్వా॒ చఖ్షు॒షా-ఽవే᳚ఖ్షే సుప్రజా॒స్త్వాయ॒ తేజో॑-ఽసి॒ తేజో-ఽను॒ ప్రేహ్య॒గ్నిస్తే॒ తేజో॒ మా వి నై॑ద॒గ్నే-ర్జి॒హ్వా-ఽసి॑ సు॒భూర్దే॒వానా॒-న్ధామ్నే॑ధామ్నే దే॒వేభ్యో॒ యజు॑షేయజుషే భవ శు॒క్రమ॑సి॒ జ్యోతి॑రసి॒ తేజో॑-ఽసి దే॒వో వ॑-స్సవి॒తో-త్పు॑నా॒త్వచ్ఛి॑ద్రేణ ప॒విత్రే॑ణ॒ వసో॒-స్సూర్య॑స్య ర॒శ్మిభి॑-శ్శు॒క్ర-న్త్వా॑ శు॒క్రాయా॒-న్ధామ్నే॑ధామ్నే దే॒వేభ్యో॒ యజు॑షేయజుషే గృహ్ణామి॒ జ్యోతి॑స్త్వా॒ జ్యోతి॑ష్య॒ర్చిస్త్వా॒-ఽర్చిషి॒ ధామ్నే॑ధామ్నే దే॒వేభ్యో॒ యజు॑షేయజుషే గృహ్ణామి ॥ 18 ॥

(ఉప॒ - నీ - ర॒శ్మిభి॑-శ్శు॒క్రగ్ం - షోడ॑శ చ) (అ. 10)

కృష్ణో᳚-ఽస్యాఖరే॒ష్ఠో᳚-ఽగ్నయే᳚ త్వా॒ స్వాహా॒ వేది॑రసి బ॒ర్॒హిషే᳚ త్వా॒ స్వాహా ॑బ॒ర్॒హిర॑సి స్రు॒గ్భ్యస్త్వా॒ స్వాహా॑ ది॒వే త్వా॒-ఽన్తరి॑ఖ్షాయ త్వా పృథి॒వ్యై త్వా᳚ స్వ॒ధా పి॒తృభ్య॒ ఊర్గ్భ॑వ బర్​హి॒షద్భ్య॑ ఊ॒ర్జా పృ॑థి॒వీ-ఙ్గ॑చ్ఛత॒ విష్ణో॒-స్స్తూపో॒-ఽస్యూర్ణా᳚మ్రదస-న్త్వా స్తృణామి స్వాస॒స్థ-న్దే॒వేభ్యో॑ గన్ధ॒ర్వో॑-ఽసి వి॒శ్వావ॑సు॒-ర్విశ్వ॑స్మా॒దీష॑తో॒ యజ॑మానస్య పరి॒ధిరి॒డ ఈ॑డి॒త ఇన్ద్ర॑స్య బా॒హుర॑సి॒- [బా॒హుర॑సి, దఖ్షి॑ణో॒] 19

దఖ్షి॑ణో॒ యజ॑మానస్య పరి॒ధిరి॒డ ఈ॑డి॒తో మి॒త్రావరు॑ణౌ త్వోత్తర॒తః పరి॑ ధత్తా-న్ధ్రు॒వేణ॒ ధర్మ॑ణా॒ యజ॑మానస్య పరి॒ధిరి॒డ ఈ॑డి॒త-స్సూర్య॑స్త్వా పు॒రస్తా᳚-త్పాతు॒ కస్యా᳚శ్చిద॒భిశ॑స్త్యా వీ॒తిహో᳚త్ర-న్త్వా కవే ద్యు॒మన్త॒గ్ం॒ సమి॑ధీమ॒హ్యగ్నే॑ బృ॒హన్త॑మద్ధ్వ॒రే వి॒శో య॒న్త్రే స్థో॒ వసూ॑నాగ్ం రు॒ద్రాణా॑-మాది॒త్యానా॒గ్ం॒ సద॑సి సీద జు॒హూరు॑ప॒భృ-ద్ధ్రు॒వా-ఽసి॑ ఘృ॒తాచీ॒ నామ్నా᳚ ప్రి॒యేణ॒ నామ్నా᳚ ప్రి॒యే సద॑సి సీదై॒తా అ॑సదన్-థ్సుకృ॒తస్య॑ లో॒కే తా వి॑ష్ణో పాహి పా॒హి య॒జ్ఞ-మ్పా॒హి య॒జ్ఞప॑తి-మ్పా॒హి మాం-యఀ ॑జ్ఞ॒నియ᳚మ్ ॥ 20 ॥

(బా॒హుర॑సి - ప్రి॒యే సద॑సి॒ - పఞ్చ॑దశ చ) (అ. 11)

భువ॑నమసి॒ వి ప్ర॑థ॒స్వాగ్నే॒ యష్ట॑రి॒ద-న్నమః॑ ।

జుహ్వేహ్య॒గ్నిస్త్వా᳚ హ్వయతి దేవయ॒జ్యాయా॒ ఉప॑భృ॒దేహి॑ దే॒వస్త్వా॑ సవి॒తా హ్వ॑యతి దేవయ॒జ్యాయా॒ అగ్నా॑విష్ణూ॒ మా వా॒మవ॑ క్రమిషం॒-విఀ జి॑హాథా॒-మ్మా మా॒ స-న్తా᳚ప్తం-లోఀ॒క-మ్మే॑ లోకకృతౌ కృణుతం॒-విఀష్ణో॒-స్స్థాన॑మసీ॒త ఇన్ద్రో॑ అకృణో-ద్వీ॒ర్యా॑ణి సమా॒రభ్యో॒ర్ధ్వో అ॑ద్ధ్వ॒రో ది॑వి॒స్పృశ॒మహ్రు॑తో య॒జ్ఞో య॒జ్ఞప॑తే॒-రిన్ద్రా॑వా॒న్-థ్స్వాహా॑ బృ॒హద్భాః పా॒హి మా᳚-ఽగ్నే॒ దుశ్చ॑రితా॒దా మా॒ సుచ॑రితే భజ మ॒ఖస్య॒ శిరో॑-ఽసి॒ సఞ్జ్యోతి॑షా॒ జ్యోతి॑రఙ్క్తామ్ ॥ 21 ॥

(అహ్రు॑త॒ - ఏక॑విగ్ంశతిశ్చ) (అ. 12)

వాజ॑స్య మా ప్రస॒వేనో᳚ద్గ్రా॒భేణోద॑గ్రభీత్ । అథా॑ స॒పత్నా॒గ్ం॒ ఇన్ద్రో॑ మే నిగ్రా॒భేణాధ॑రాగ్ం అకః ॥ ఉ॒ద్గ్రా॒భ-ఞ్చ॑ నిగ్రా॒భ-ఞ్చ॒ బ్రహ్మ॑ దే॒వా అ॑వీవృధన్న్ । అథా॑ స॒పత్నా॑నిన్ద్రా॒గ్నీ మే॑ విషూ॒చీనా॒న్ వ్య॑స్యతామ్ ॥ వసు॑భ్యస్త్వా రు॒ద్రేభ్య॑స్త్వా-ఽఽది॒త్యేభ్య॑స్త్వా॒-ఽక్తగ్ం రిహా॑ణా వి॒యన్తు॒ వయః॑ ॥ ప్ర॒జాం-యోఀని॒-మ్మా నిర్మృ॑ఖ్ష॒మా ప్యా॑యన్తా॒మాప॒ ఓష॑ధయో మ॒రుతా॒-మ్పృష॑తయ-స్స్థ॒ దివం॑- [దివ᳚మ్, గ॒చ్ఛ॒ తతో॑ నో॒] 22

గచ్ఛ॒ తతో॑ నో॒ వృష్టి॒మేర॑య । ఆ॒యు॒ష్పా అ॑గ్నే॒-ఽస్యాయు॑ర్మే పాహి చఖ్షు॒ష్పా అ॑గ్నే-ఽసి॒ చఖ్షు॑ర్మే పాహి ధ్రు॒వా-ఽసి॒ య-మ్ప॑రి॒ధి-మ్ప॒ర్యధ॑త్థా॒ అగ్నే॑ దేవ ప॒ణిభి॑-ర్వీ॒యమా॑ణః । త-న్త॑ ఏ॒తమను॒ జోష॑-మ్భరామి॒ నేదే॒ష త్వద॑పచే॒తయా॑తై య॒జ్ఞస్య॒ పాథ॒ ఉప॒ సమి॑తగ్ం సగ్గ్​స్రా॒వభా॑గా-స్స్థే॒షా బృ॒హన్తః॑ ప్రస్తరే॒ష్ఠా బ॑ర్​హి॒షద॑శ్చ [ ] 23

దే॒వా ఇ॒మాం-వాఀచ॑మ॒భి విశ్వే॑ గృ॒ణన్త॑ ఆ॒సద్యా॒స్మి-న్బ॒ర్॒హిషి॑ మాదయద్ధ్వమ॒గ్నే-ర్వా॒మప॑న్నగృహస్య॒ సద॑సి సాదయామి సు॒న్నాయ॑ సున్నినీ సు॒న్నే మా॑ ధత్త-న్ధు॒రి ధ॒ర్యౌ॑ పాత॒మగ్నే॑ ఽదబ్ధాయో ఽశీతతనో పా॒హి మా॒-ఽద్య ది॒వః పా॒హి ప్రసి॑త్యై పా॒హి దురి॑ష్ట్యై పా॒హి దు॑రద్మ॒న్యై పా॒హి దుశ్చ॑రితా॒దవి॑ష-న్నః పి॒తు-ఙ్కృ॑ణు సు॒షదా॒ యోని॒గ్గ్॒ స్వాహా॒ దేవా॑ గాతువిదో గా॒తుం​విఀ॒త్త్వా గా॒తు మి॑త॒ మన॑సస్పత ఇ॒మ-న్నో॑ దేవ దే॒వేషు॑ య॒జ్ఞగ్గ్​ స్వాహా॑ వా॒చి స్వాహా॒ వాతే॑ ధాః ॥ 24 ॥

(దివం॑ - చ - వి॒త్త్వా గా॒తుం - త్రయో॑దశ చ) (అ. 13)

ఉ॒భా వా॑మిన్ద్రాగ్నీ ఆహు॒వద్ధ్యా॑ ఉ॒భా రాధ॑స-స్స॒హ మా॑ద॒యద్ధ్యై᳚ । ఉ॒భా దా॒తారా॑వి॒షాగ్ం ర॑యీ॒ణాము॒భా వాజ॑స్య సా॒తయే॑ హువే వామ్ ॥ అశ్ర॑వ॒గ్ం॒ హి భూ॑రి॒దావ॑త్తరా వాం॒-విఀజా॑మాతురు॒త వా॑ ఘా స్యా॒లాత్ । అథా॒ సోమ॑స్య॒ ప్రయ॑తీ యు॒వభ్యా॒మిన్ద్రా᳚గ్నీ॒ స్తోమ॑-ఞ్జనయామి॒ నవ్య᳚మ్ ॥ ఇన్ద్రా᳚గ్నీ నవ॒తి-మ్పురో॑ దా॒సప॑త్నీరధూనుతమ్ । సా॒కమేకే॑న॒ కర్మ॑ణా ॥ శుచి॒-న్ను స్తోమ॒-న్నవ॑జాత-మ॒ద్యేన్ద్రా᳚గ్నీ వృత్రహణా జు॒షేథా᳚మ్ ॥ 25 ॥

ఉ॒భా హి వాగ్ం॑ సు॒హవా॒ జోహ॑వీమి॒ తా వాజగ్ం॑ స॒ద్య ఉ॑శ॒తే ధేష్ఠా᳚ ॥ వ॒యము॑ త్వా పథస్పతే॒ రథ॒-న్న వాజ॑సాతయే । ధి॒యే పూ॑షన్నయుజ్మహి ॥ ప॒థస్ప॑థః॒ పరి॑పతిం-వఀచ॒స్యా కామే॑న కృ॒తో అ॒భ్యా॑నడ॒ర్కమ్ । సనో॑ రాసచ్ఛు॒రుధ॑శ్చ॒న్ద్రాగ్రా॒ ధియ॑న్ధియగ్ం సీషధాతి॒ ప్ర పూ॒షా ॥ ఖ్షేత్ర॑స్య॒ పతి॑నా వ॒యగ్ం హి॒తేనే॑వ జయామసి । గామశ్వ॑-మ్పోషయి॒త్న్వా స నో॑ [స నః॑, మృ॒డా॒తీ॒దృశే᳚ ।] 26

మృడాతీ॒దృశే᳚ ॥ ఖ్షేత్ర॑స్య పతే॒ మధు॑మన్త-మూ॒ర్మి-న్ధే॒నురి॑వ॒ పయో॑ అ॒స్మాసు॑ ధుఖ్ష్వ । మ॒ధు॒శ్చుత॑-ఙ్ఘృ॒తమి॑వ॒ సుపూ॑త-మృ॒తస్య॑ నః॒ పత॑యో మృడయన్తు ॥ అగ్నే॒ నయ॑ సు॒పథా॑ రా॒యే అ॒స్మాన్. విశ్వా॑ని దేవ వ॒యునా॑ని వి॒ద్వాన్ । యు॒యో॒ద్ధ్య॑స్మ-జ్జు॑హురా॒ణమేనో॒ భూయి॑ష్ఠా-న్తే॒ నమ॑ఉక్తిం-విఀధేమ ॥ ఆ దే॒వానా॒మపి॒ పన్థా॑-మగన్మ॒ యచ్ఛ॒క్నవా॑మ॒ తదను॒ ప్రవో॑ఢుమ్ । అ॒గ్ని-ర్వి॒ద్వాన్-థ్స య॑జా॒- [స య॑జాత్, సేదు॒ హోతా॒ సో] 27

థ్సేదు॒ హోతా॒ సో అ॑ద్ధ్వ॒రాన్-థ్స ఋ॒తూన్ క॑ల్పయాతి ॥యద్వాహి॑ష్ఠ॒-న్తద॒గ్నయే॑ బృ॒హద॑ర్చ విభావసో । మహి॑షీవ॒ త్వద్ర॒యిస్త్వద్వాజా॒ ఉదీ॑రతే ॥ అగ్నే॒ త్వ-మ్పా॑రయా॒ నవ్యో॑ అ॒స్మాన్-థ్స్వ॒స్తిభి॒రతి॑ దు॒ర్గాణి॒ విశ్వా᳚ । పూశ్చ॑ పృ॒థ్వీ బ॑హు॒లా న॑ ఉ॒ర్వీ భవా॑ తో॒కాయ॒ తన॑యాయ॒ శం-యోః ఀ॥ త్వమ॑గ్నే వ్రత॒పా అ॑సి దే॒వ ఆ మర్త్యే॒ష్వా । త్వం-యఀ॒జ్ఞేష్వీడ్యః॑ ॥ యద్వో॑ వ॒య-మ్ప్ర॑మి॒నామ॑ వ్ర॒తాని॑ వి॒దుషా᳚-న్దేవా॒ అవి॑దుష్టరాసః । అ॒గ్నిష్ట-ద్విశ్వ॒మా పృ॑ణాతి వి॒ద్వాన్. యేభి॑-ర్దే॒వాగ్ం ఋ॒తుభిః॑ క॒ల్పయా॑తి ॥ 28 ॥

(జు॒షేథా॒మా - స నో॑ - యజా॒ - దా - త్రయో॑విగ్ంశతిశ్చ) (అ. 14)

(ఇ॒షే త్వా॑ - య॒జ్ఞస్య॒ - శున్ధ॑ధ్వం॒ - కర్మ॑ణే వాం - దే॒వో-ఽవ॑ధూతం॒ - ధుష్టిః॒ - సం-వఀ ॑పా॒- మ్యా ద॑దే॒ - ప్రత్యు॑ష్టం॒ - కృష్ణో॑-ఽసి॒ - భువ॑నమసి॒ - వాజ॑స్యో॒భా వాం॒ - చతు॑ర్దశ )

(ఇ॒షే - దృగ్ం॑హ॒ - భువ॑న - మ॒ష్టావిగ్ం॑శతిః )

(ఇ॒షే త్వా॑, క॒ల్పయా॑తి)

॥ హరిః॑ ఓమ్ ॥

॥ కృష్ణ యజుర్వేదీయ తైత్తిరీయ సంహితాయా-మ్ప్రథమకాణ్డే ప్రథమః ప్రశ్న-స్సమాప్తః ॥