కొండగల్గిన కోట పాట లిరిక్స్

కొండగల్గిన కోట, కోటగల్గిన కొండ

కోట కొండలలోన మేటి యా పెనుగొండ॥

ఏనుగుల ఎలుగుతో రౌతుల రవళితో

మేనాల మెరుపుతో మెరిసింది పెనుగొండ॥

కులికేటి గానాలు కుణిసేటి ఖడ్గాలు

పలికేటి ఘంటలు ప్రబలింది పెనుగొండ॥

భళ్ళరాయని బాహుదర్పము లోనె

నేలనీడై ఉంది నెగడింది పెనుగొండ॥

భోజరాయని గద్దె భూస్థాపితము జేసి

బుక్కరాయని కొప్పజెప్పింది పెనుగొండ॥

గజపతుల నోడించి కటకానకంపిన

సాళ్వ నరసింహయ్య సాకింది పెనుగొండ॥

రుద్రుడైనా పట్టి ముద్దర్లుకాల్చిన

తిరుమల తాతయ్య తిరునాళ్ళ పెనుగొండ॥

ద్రాక్షారసములోన దానిమ్మలని జేర్చి

జుంటితేనెలతోడ జుర్రింది పెనుగొండ॥

తిట్లలో తిమ్మయ్య కవితలో బ్రహ్మయ్య

తెనాలిరామయ్య తిరిగింది పెనుగొండ॥

బాపనయ్యల నడుమ పల్లకీ నెక్కించి

భట్టుమూర్తికి కీర్తి తెచ్చింది పెనుగొండ॥